ਮੰਗੂ ਵੀ ਉਡੀਕਦੇ ਨੇ, ਸ਼ੇਰੂ ਵੀ ਉਡੀਕਦੇ ਨੇ, ਪੈਲ਼ੀਆਂ ਨੂੰ ਲੱਗੀ ਏ ਪਿਆਸ ,
ਇੱਕ ਵਾਰੀ ਨਾਨਕੀ ਦੇ ਵੀਰ ਜੇ ਦਿਖਾਵੇ ਮੁੱਖ, ਪੁੱਗ ਜਾਏ ਸਭਨਾਂ ਦੀ ਆਸ ......
ਇੱਕ ਵਾਰੀ, ਪਹਿਲਾਂ ਵਾਂਗੂੰ ਫੇਰ ਨਨਕਾਣੇ ਵਲੋਂ ਸਾਡੇ ਕੋਲੇ ਆ ਜਾ ਨਿੰਰਕਾਰ,
ਮੇਟ ਧੁੰਦ, ਸਾਰੇ ਹੀ ਜਹਾਨ ਉੱਤੇ ਦਿਸਦੀ ਜੋ ਦੂਰ ਕਰ ਸਾਰਾ ਅੰਧਕਾਰ ,
ਤੇਰਾ-ਤੇਰਾ ਕਹਿ ਕੇ, ਤੂੰ ਤਾਂ ਹੋ ਗਿਆ ਸੀ ਸਾਰਿਆਂ ਦਾ, ਹੁਣ ਸਾਨੂੰ ਕਰੀਂ ਨਾ ਨਿਰਾਸ਼...
ਤੇਰੇ ਹੀ ਗਿਰਾਂ ਦੀ ਪਾਕ -ਧੂੜੀ ਦੀ ਵੀ ਕਦੋਂ ਤੱਕ? ਲਾ ਨਾ ਸਕਾਂਗੇ ਮੱਥੇ ਛੋਹ ,
ਕਦੋਂ ਤੀਕ ਸਾਡੇ ਉੱਤੇ , ਬੰਦਸ਼ਾਂ ਇਹ ਰਹਿਣੀਆਂ ਨੇ? ਕਦੋਂ ਹੋਉ ਚਾਨਣਾ ਵੇ ਲੋਅ,
ਇੱਕੋ ਧਰਤੀ ਦੇ ਪੁੱਤ ਰਲ਼ ਬੈਠਣੇ ਨੇ ? ਕਦੋਂ ਸੱਚ ਹੋਣਗੇ ਕਿਆਸ ? ......
ਮਿੱਠੀ -ਮਿੱਠੀ ਬਾਣੀ ਤੇਰੀ ਮਿੱਠੇ-ਮਿੱਠੇ ਮਹਿਰਮਾਂ ਵੇ ਮਿੱਠੇ-ਮਿੱਠੇ ਲੱਗਦੇ ਨੇ ਬੋਲ ,
ਮਿੱਠੇ-ਮਿੱਠੇ ਬੋਲ ਜੇ ਸੁਣਾਵੇਂ ਇਕ ਵਾਰ ਆ ਕੇ, ਭਰ ਜਾਵੇ ਸਭਨਾਂ ਦੀ ਝੋਲ ,
ਉਂਝ ਤਾਂ ਦਿਲਾਂ ਦੇ ਕਹਿੰਦੇ , ਦਿਲਾਂ ਨੂੰ ਵੀ ਰਾਹ ਹੁੰਦੇ, ਕਰ ਸਾਡੇ ਕਾਰਜਾਂ ਨੂੰ ਰਾਸ......।
-ਗੁਰੂ ਕੀ ਨਗਰੀ ਮੰਡੀ ਗੋਬਿੰਦਗੜ੍ਹ। ਮੋਬਾਈਲ : 95927-27087
