ਗਿੱਦੜਬਾਹਾ, 24 ਦਸੰਬਰ (ਸ਼ਿਵਰਾਜ ਸਿੰਘ ਬਰਾੜ)-ਅਕਸਰ ਚਰਚਾ 'ਚ ਚੱਲੀ ਆ ਰਹੀ ਗਿੱਦੜਬਾਹਾ ਤਹਿਸੀਲ ਵਿਖੇ ਆਮ ਲੋਕ ਰਜਿਸਟਰੀਆਂ ਤੋਂ ਇਲਾਵਾ ਹੋਰ ਨਿੱਜੀ ਕਾਨੂੰਨੀ ਕੰਮਕਾਜ ਕਰਵਾਉਣ ਲਈ ਖ਼ੱਜਲ-ਖ਼ੁਆਰ ਹੋ ਰਹੇ ਹਨ, ਜਿਸ ਨੇ ਸੂਬਾ ਸਰਕਾਰ ਵਲੋਂ 'ਈ ਜ਼ੀ ਰਜਿਸਟਰੀਆਂ' 'ਨਾ ਦੇਰੀ ਨਾ ਰਿਸ਼ਵਤ' ਦੇ ਕੀਤੇ ਜਾ ਰਹੇ ਦਾਅਵਿਆਂ ਦੀ ਫ਼ੂਕ ਕੱਢ ਦਿੱਤੀ ਹੈ | ਜ਼ਿਕਰਯੋਗ ਹੈ ਕਿ ਲੰਬੇ ਸਮੇਂ ਤੋਂ ਅਕਸਰ ਹੀ ਤਹਿਸੀਲਦਾਰ ਤੇ ਨਾਇਬ ਤਹਿਸੀਲਦਾਰ ਦੇ ਅਹੁਦੇ 'ਤੇ ਕੋਈ ਵੀ ਅਧਿਕਾਰੀ ਪੱਕੇ ਤੌਰ 'ਤੇ ਟਿਕਿਆ ਹੀ ਨਹੀਂ | ਕੁੱਝ ਸਮਾਂ ਪਹਿਲਾਂ ਤਹਿਸੀਲਦਾਰ ਦੇ ਸੇਵਾ ਮੁਕਤ ਹੋਣ ਉਪਰੰਤ ਨਵੀਂ ਨਿਯੁਕਤੀ ਨਹੀਂ ਹੋਈ ਤੇ ਸਮੁੱਚੇ ਕੰਮਕਾਜ ਦਾ ਬੋਝ ਇਕੱਲੇ ਨਾਇਬ ਤਹਿਸੀਲਦਾਰ ਨੂੰ ਹੀ ਝੱਲਣਾ ਪੈਂਦਾ ਰਿਹਾ | ਜਾਣਕਾਰੀ ਅਨੁਸਾਰ ਹੁਣ ਨਇਬ ਤਹਿਸੀਲਦਾਰ ਵੀ ਸੇਵਾ ਮੁਕਤ ਹੋਣ ਜਾ ਰਹੇ ਹਨ ਤੇ ਉਨ੍ਹਾਂ ਨੇ ਵੀ ਛੁੱਟੀ ਲੈ ਲਈ ਹੈ | ਚਰਚਾ ਇਹ ਹੈ ਕਿ ਇਥੇ ਕੋਈ ਅਧਿਕਾਰੀ ਪੱਕੇ ਤੌਰ 'ਤੇ ਟਿਕਣ ਨੂੰ ਤਿਆਰ ਨਹੀਂ ਹੈ | ਆਪਣੀਆਂ ਰਜਿਸਟਰੀਆਂ ਤੋਂ ਇਲਾਵਾ ਕਾਨੂੰਨੀ ਜ਼ਰੂਰੀ ਕੰਮਾਂ ਲਈ ਆਮ ਲੋਕਾਂ ਨੂੰ ਖ਼ੱਜਲ-ਖ਼ੁਆਰ ਹੋਣਾ ਪੈ ਰਿਹਾ ਹੈ | ਆਪਣੀਆਂ ਰਜਿਸਟਰੀ ਕਰਵਾਉਣ ਲਈ ਤਹਿਸੀਲ ਦਫ਼ਤਰ ਪਹੁੰਚੇ ਪਿੰਡ ਬੱਪਾ ਜ਼ਿਲ੍ਹਾ ਸਿਰਸਾ (ਹਰਿਆਣਾ) ਦੇ ਬਲਦੇਵ ਸਿੰਘ ਨੇ ਕਿਹਾ ਕਿ ਬੀਤੇ ਤਿੰਨ-ਚਾਰ ਦਿਨਾਂ ਤੋਂ ਰੋਜ਼ਾਨਾ ਲੰਮਾ ਪੈਂਡਾ ਤਹਿ ਕਰਕੇ ਜ਼ਮੀਨ ਦੀ ਰਜਿਸਟਰੀ ਕਰਵਾਉਣ ਲਈ ਗਿੱਦੜਬਾਹਾ ਵਿਖੇ ਆਉਂਦੇ ਹਨ ਤੇ ਇਥੇ ਪਹੁੰਚਣ 'ਤੇ ਪਤਾ ਲਗਦਾ ਹੈ ਕਿ ਅਧਿਕਾਰੀ ਮੌਜੂਦ ਨਹੀਂ ਹਨ | ਹਰਮਨਪ੍ਰੀਤ ਸਿੰਘ ਗੁਰੂਸਰ ਨੇ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਦਾ ਕਹਿਣਾ ਹੈ ਕਿ ਹੁਣ ਰਜਿਸਟਰੀਆਂ ਦਾ ਕੰਮ ਸੌਖਾ ਕਰ ਦਿੱਤਾ ਹੈ ਤੇ ਟੋਕਨ ਮਿਲਣ ਉਪਰੰਤ ਤੁਰੰਤ ਰਜਿਸਟਰੀ ਕੀਤੀ ਜਾਵੇਗੀ | ਉਸ ਨੂੰ ਦਫ਼ਤਰ ਵਿਚੋਂ 22 ਦਸੰਬਰ ਨੂੰ ਤਿੰਨ ਟੋਕਨ ਮਿਲਣ ਦੇ ਬਾਵਜੂਦ ਅੱਜ ਤੱਕ ਰਜਿਸਟਰੀ ਨਹੀਂ ਹੋਈ | ਉਸ ਨੂੰ ਦਫ਼ਤਰ ਵਿਚੋਂ ਸੁਨੇਹਾ ਲੱਗਿਆ ਸੀ ਕਿ ਅੱਜ ਰਜਿਸਟਰੀ ਹੋਵੇਗੀ, ਪਰ ਦਫ਼ਤਰ ਪਹੁੰਚਣ 'ਤੇ ਪਤਾ ਲੱਗਿਆ ਹੈ ਕਿ ਅਧਿਕਾਰੀ ਛੁੱਟੀ 'ਤੇ ਹਨ | ਪਿੰਡ ਲਾਲਬਾਈ ਤੋਂ ਬਲਦੇਵ ਸਿੰਘ, ਜਗਦੀਸ਼ ਸਿੰਘ, ਮਨਦੀਪ ਕੌਰ, ਪਿੰਡ ਹੁਸਨਰ ਸਿੰਘ ਦੇ ਮਨਦੀਪ ਸਿੰਘ ਤੇ ਸਰਬਜੀਤ ਸਿੰਘ ਦਾ ਕਹਿਣਾ ਸੀ ਕਿ ਉਹ ਤਿੰਨ-ਚਾਰ ਦਿਨਾਂ ਤੋਂ ਦਫ਼ਤਰ ਦੇ ਗੇੜੇ ਕੱਢ ਰਹੇ ਹਨ, ਪਰ ਹਜ਼ਾਰਾਂ ਰੁਪਏ ਲਗਾਉਣ ਦੇ ਬਾਵਜੂਦ ਰਜਿਸਟਰੀ ਨਾ ਹੋਣ ਕਰਕੇ ਉਨ੍ਹਾਂ ਦਾ ਸਮਾਂ ਬਰਬਾਦ ਹੋ ਰਿਹਾ ਹੈ | ਐੱਸ.ਡੀ.ਐੱਮ. ਜਸਪਾਲ ਸਿੰਘ ਵਲੋਂ ਫ਼ੋਨ 'ਤੇ ਜਾਣਕਾਰੀ ਦਿੰਦਿਆਂ ਦੱਸਿਆ ਗਿਆ ਕਿ ਜਲਦੀ ਹੀ ਰਜਿਸਟਰੀਆਂ ਕਰਨ ਲਈ ਕਿਸੇ ਅਧਿਕਾਰੀ ਦੀ ਜ਼ਿੰਮੇਵਾਰੀ ਲਗਾ ਰਹੇ ਹਨ |
