ਲਹਿੰਦੇ ਪੰਜਾਬ ਦੀ ਵਿਧਾਨ ਸਭਾ ਨੇ ਪਤੰਗਬਾਜ਼ੀ ਸੰਬੰਧੀ ਨਿਯਮ ਬਿੱਲ-2025 ਕੀਤਾ ਪਾਸ

ਅੰਮ੍ਰਿਤਸਰ, 25 ਦਸੰਬਰ (ਸੁਰਿੰਦਰ ਕੋਛੜ)-ਲਹਿੰਦੇ ਪੰਜਾਬ ਦੀ ਵਿਧਾਨ ਸਭਾ ਨੇ ਸੂਬੇ 'ਚ ਪਤੰਗਾਂ ਉਡਾਉਣ ਸੰਬੰਧੀ ਨਿਯਮ ਬਿੱਲ 2025 ਨੂੰ ਬਹੁਮਤ ਵੋਟਾਂ ਨਾਲ ਪਾਸ ਕਰ ਦਿੱਤਾ ਹੈ, ਜਿਸ 'ਚ ਮਨੁੱਖੀ ਜਾਨ ਅਤੇ ਜਾਇਦਾਦ ਦੀ ਰੱਖਿਆ ਲਈ ਸਖ਼ਤ ਨਵੇਂ ਨਿਯਮ ਅਤੇ ਜੁਰਮਾਨੇ ਪੇਸ਼ ਕੀਤੇ ਗਏ ਹਨ। ਨਵੇਂ ਕਾਨੂੰਨ ਨਾਲ ਪੰਜਾਬ 'ਚ ਪਤੰਗਾਂ ਉਡਾਉਣ ਸੰਬੰਧੀ ਮਨਾਹੀ ਆਰਡੀਨੈਂਸ 2001 ਰੱਦ ਹੋ ਗਿਆ ਹੈ। ਉਕਤ ਬਿੱਲ ਦੇ ਅਨੁਸਾਰ ਧਾਤ ਦੀ ਤਾਰ ਵਾਲੀ ਡੋਰ, ਨਾਈਲਨ ਦੀ ਡੋਰ ਅਤੇ ਰਸਾਇਣਿਕ ਤੌਰ 'ਤੇ ਲੇਪੀਆਂ ਜਾਂ ਕੱਚ ਨਾਲ ਢਕੀਆਂ ਪਤੰਗ ਦੇ ਮਾਂਝਾ ਦੀ ਵਰਤੋਂ, ਨਿਰਮਾਣ, ਸਟੋਰੇਜ ਅਤੇ ਵਿੱਕਰੀ 'ਤੇ ਪਾਬੰਦੀ ਲਗਾਈ ਜਾਵੇਗੀ। ਬਿੱਲ ਉਲੰਘਣਾਵਾਂ ਲਈ ਸਖ਼ਤ ਸਜ਼ਾਵਾਂ ਤੈਅ ਕੀਤੀਆਂ ਗਈਆਂ ਹਨ। ਬਿਨਾਂ ਇਜਾਜ਼ਤ ਦੇ ਪਤੰਗ ਉਡਾਉਣ ਜਾਂ ਗੈਰ-ਕਾਨੂੰਨੀ ਤੌਰ 'ਤੇ ਪਤੰਗ ਬਣਾਉਣ, ਸਟੋਰ ਕਰਨ ਜਾਂ ਵੇਚਣ 'ਤੇ ਤਿੰਨ ਤੋਂ ਪੰਜ ਸਾਲ ਦੀ ਕੈਦ, 20 ਲੱਖ ਰੁਪਏ ਤੱਕ ਦਾ ਜੁਰਮਾਨਾ ਜਾਂ ਦੋਵੇਂ ਹੋ ਸਕਦੇ ਹਨ। ਪਾਬੰਦੀਸ਼ੁਦਾ ਪਤੰਗ ਦੀਆਂ ਡੋਰਾਂ ਦੇ ਨਿਰਮਾਣ ਜਾਂ ਵਿੱਕਰੀ 'ਚ ਸ਼ਾਮਲ ਲੋਕਾਂ ਨੂੰ ਪੰਜ ਤੋਂ ਸੱਤ ਸਾਲ ਦੀ ਕੈਦ ਜਾਂ 50 ਲੱਖ ਰੁਪਏ ਤੱਕ ਦਾ ਜੁਰਮਾਨਾ ਹੋ ਸਕਦਾ ਹੈ।