ਮੈਂ ਕ੍ਰਾਂਤੀ
ਜ਼ਿਆਦਾਤਰ
ਇਕ ਚਿਣਗ ਤੋਂ ਹੀ
ਅੱਗ ਦਾ ਭਾਂਬੜ ਬਣਦੀ ਹਾਂ
ਤੇ ਆਪਣੇ ਦਾਇਰੇ 'ਚ ਆਉਂਦੇ
ਹਰ ਸ਼ਖ਼ਸ, ਹਰ ਸ਼ੈਅ ਨੂੰ
ਸੁਆਹ ਕਰ ਦਿੰਦੀ ਹਾਂ।
ਮੈਂ ਕ੍ਰਾਂਤੀ
ਬਦਲਾਅ ਦੇ ਹੋਕੇ ਨੂੰ
ਇਕ ਸੁਣੀ ਜਾਣ ਵਾਲੀ ਗੂੰਜ 'ਚ
ਤਬਦੀਲ ਕਰਦੀ ਹਾਂ
ਤੇ ਫਿਰ ਕੰਨਾਂ ਦੇ ਪਰਦਿਆਂ ਦੀ
ਨਾਜ਼ੁਕ ਮਿਜ਼ਾਜੀ ਨੂੰ ਪੂਰੀ ਤਰ੍ਹਾਂ
ਨਜ਼ਰ-ਅੰਦਾਜ਼ ਕਰਦੀ ਹਾਂ।
ਮੈਂ ਕ੍ਰਾਂਤੀ
ਸਬਰ ਦੇ ਘੁੱਟ ਪੀ-ਪੀ ਕੇ
ਆਫਰੇ ਹੋਏ ਲੋਕਾਂ ਲਈ
ਦਵਾ ਬਣਨ ਦਾ ਦਾਅਵਾ ਕਰਦੀ ਹਾਂ
ਪਰ ਅਲਸਰ ਬਣ ਕੇ ਫੁੱਟੇ
ਮਵਾਦ ਨੂੰ ਰੋਕਣ ਲਈ
ਆਪ੍ਰੇਸ਼ਨ ਟੇਬਲ ਬਣ ਨਿਬੜਦੀ ਹਾਂ।
ਮੈਂ ਕ੍ਰਾਂਤੀ
ਇਸ ਵੇਲੇ ਨੇਪਾਲ 'ਚ ਹਾਂ
ਜਿਥੇ ਚਿਣਗ ਬਸ
ਕੁਝ ਪਾਬੰਦੀਆਂ ਦੀ ਸੀ
ਪਰ ਮੇਰੀ ਅੱਗ 'ਚ ਸਾੜੇ ਜਾ ਰਹੇ ਹਨ
ਜ਼ਿੰਦਾ ਲੋਕ
ਸੰਸਦ ਭਵਨ, ਸੁਪਰੀਮ ਕੋਰਟ ਵੀ
ਮੇਰੇ ਦਾਇਰੇ 'ਚ ਹਨ
ਬਦਲਾਅ ਦਾ ਹੋਕਾ
ਹਕੀਕਤ ਬਣਨ ਦੇ ਐਨ ਨਜ਼ਦੀਕ ਹੈ।
ਤੇ
ਮੈਂ ਕ੍ਰਾਂਤੀ
ਇਕੱਲਿਆਂ ਬੈਠ ਸੋਚ ਰਹੀ ਹਾਂ
ਕਿ ਏਨਾ ਦਰਦਨਾਕ ਕਿਉਂ ਹੈ?
ਸਬਰ
ਬਦਲਾਅ
ਅਤੇ ਮੇਰਾ ਹੋਣਾ।
-ਉਪਮਾ ਡਾਗਾ ਪਾਰਥ
ਮੋਬਾਈਲ : 099101-88350
ਈਮੇਲ : upma.dagga@gmail.com