ਪਛਤਾਵਾ

ਰਾਤ 9 ਵਜੇ ਦੇ ਕਰੀਬ ਅਸੀਂ ਲਾਈਟਾਂ ਤੇ ਗੇਟ ਬੰਦ ਕਰ ਕੇ ਸੌਣ ਹੀ ਲੱਗੇ ਸੀ ਕਿ ਅਚਾਨਕ ਬੈੱਲ ਵੱਜੀ।
'ਕੌਣ ਹੈ?' ਮੈਂ ਲੌਬੀ ਵਾਲਾ ਗੇਟ ਖੋਲ੍ਹਿਆ ਤੇ ਉੱਥੇ ਖੜ੍ਹੇ ਨੇ ਹੀ ਪੁੱਛਿਆ। ਗਲੀ ਵਿਚ ਪੂਰਣ ਤੌਰ 'ਤੇ ਹਨੇਰਾ ਸੀ। ਇਕ ਦਬੀ ਜਿਹੀ ਆਵਾਜ਼ ਆਈ 'ਟਿਫਨ ਲੈਣਾ ਸੀ ਵਾਪਿਸ।'
'ਇਹ ਕਿਹੜਾ ਟਾਈਮ ਐ ਅੱਧੀ ਰਾਤ ਟਿਫਨ ਵਾਪਸ ਲੈਣ ਆਉਣ ਦਾ?' ਮੈਂ ਉੱਥੋਂ ਹੀ ਖੜ੍ਹੇ ਨੇ ਖਿੱਝਦੇ ਹੋਏ ਕਿਹਾ।
ਮੈਂ ਲਾਈਟ ਜਗਾਈ ਤੇ ਕਿਚਨ ਵਿਚੋਂ ਖਾਲੀ ਟਿਫਨ (ਜੋ ਕਿ ਦੁਪਹਿਰ ਸਮੇਂ ਅਸੀਂ ਮੰਗਵਾਇਆ ਸੀ) ਚੁੱਕ ਕੇ ਮੇਨ ਗੇਟ ਦੇ ਉੱਪਰ ਦੀ ਹੀ ਫੜਾ ਦਿੱਤਾ।
ਮੈਂ ਦੇਖਿਆ ਟਿਫਨ ਲੈਣ ਆਈ ਇਕ ਲੜਕੀ ਸੀ ਜੋ ਕਿ ਸਕੂਟਰੀ 'ਤੇ ਟਿਫਨ ਸਪਲਾਈ ਕਰਦੀ ਹੈ।
ਟਿਫਨ ਫੜਾ ਕੇ ਅੰਦਰ ਆਇਆ ਤਾਂ ਮੈਨੂੰ ਬਹੁਤ ਪਛਤਾਵਾ ਹੋਇਆ ਕਿ ਮੈਨੂੰ 9 ਵਜੇ ਹੀ ਲਾਈਟ ਜਗਾਉਣ ਅਤੇ ਗੇਟ ਖੋਲ੍ਹਣ ਲੱਗਿਆਂ 'ਅੱਧੀ ਰਾਤ' ਲੱਗਦੀ ਹੈ ਤੇ ਉਹ ਕੋਈ ਮਜਬੂਰ ਲੜਕੀ ਉਸ ਸਮੇਂ ਘਰਾਂ 'ਚ ਦਿੱਤੇ ਟਿਫਨ ਵਾਪਸ ਲੈਂਦੀ ਫਿਰਦੀ ਹੈ। ਪਤਾ ਨਹੀ ਕਿੰਨੇ ਵਜੇ ਸੌਣਾ ਨਸੀਬ ਹੋਊ ਵਿਚਾਰੀ ਨੂੰ?
ਪਛਤਾਵੇ ਕਾਰਣ ਕਾਫੀ ਸਮਾਂ ਮੈਨੂੰ ਨੀਂਦ ਨਸੀਬ ਨਹੀਂ ਹੋਈ।
ਮਨ ਹੀ ਮਨ ਮੁਆਫ਼ੀ ਮੰਗਦਾ ਰਿਹਾ ਉਸ ਲੜਕੀ ਤੋਂ।

-ਗੁਰੂ ਨਾਨਕ ਕਾਲੋਨੀ ਸੰਗਰੂਰ
ਮੋਬਾਈਲ : 81465-80919