ਪਾਕਿ ਵਲੋਂ ਸੁਰੱਖਿਅਤ ਐਲਾਨੀ ਰਾਜ ਕਪੂਰ ਦੀ ਜੱਦੀ ਹਵੇਲੀ ਦਾ ਇਕ ਹਿੱਸਾ ਭੂਚਾਲ ਤੇ ਮੀਂਹ ਨਾਲ ਡਿੱਗਾ

ਅੰਮਿ੍ਤਸਰ, 4 ਅਪ੍ਰੈਲ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਪਿਸ਼ਾਵਰ ਸ਼ਹਿਰ ਦੇ ਮੁਹੱਲਾ ਕਿੱਸਾ ਖਵਾਨੀ ਵਿਚਲਾ 6.25 ਮਰਲੇ 'ਚ ਬਣਿਆ ਬਾਲੀਵੁੱਡ ਦੇ ਮਸ਼ਹੂਰ ਕਲਾਕਾਰ ਸਵ. ਰਾਜ ਕਪੂਰ ਦੀ ਹਵੇਲੀ ਦਾ ਇਕ ਹਿੱਸਾ ਹਾਲ ਹੀ 'ਚ ਆਈ ਭਾਰੀ ਬਾਰਿਸ਼ ਅਤੇ ਉਸ ਤੋਂ ਬਾਅਦ ਸ਼ੁੱਕਰਵਾਰ ਰਾਤ ਨੂੰ ਆਏ ਭੂਚਾਲ ਕਾਰਨ ਢਹਿ ਗਿਆ | ਪਾਕਿ ਦੇ ਸੂਬਾ ਖ਼ੈਬਰ ਪਖਤੂਨਖਵਾ ਦੀ ਸੂਬਾਈ ਸਰਕਾਰ ਵਲੋਂ ਲਗਭਗ ਇਕ ਸਦੀ ਪੁਰਾਣੀ ਇਸ ਕਪੂਰ ਹਵੇਲੀ ਨੂੰ ਸਾਲ 2016 'ਚ ਕੌਮੀ ਵਿਰਾਸਤ ਸਥਾਨ ਐਲਾਨਿਆ ਗਿਆ ਸੀ | ਖ਼ੈਬਰ ਪਖਤੂਨਖਵਾ ਵਿਰਾਸਤ ਕੌਂਸਲ ਦੇ ਸਕੱਤਰ ਸ਼ਕੀਲ ਵਹੀਦੁੱਲਾ ਨੇ ਕਿਹਾ ਕਿ ਭੂਚਾਲ ਤੋਂ ਬਾਅਦ ਹਵੇਲੀ ਦੀ ਕੰਧ ਦਾ ਇਕ ਹਿੱਸਾ ਢਹਿ ਗਿਆ | ਵਹੀਦੁੱਲਾ ਨੇ ਪੁਰਾਤਤਵ ਵਿਭਾਗ ਅਤੇ ਸੂਬਾਈ ਸਰਕਾਰ ਨੂੰ ਵਿਰਾਸਤੀ ਇਮਾਰਤ ਨੂੰ ਸੁਰੱਖਿਅਤ ਰੱਖਣ ਅਤੇ ਬਹਾਲ ਕਰਨ ਲਈ ਤੁਰੰਤ ਕਦਮ ਚੁੱਕਣ ਦੀ ਅਪੀਲ ਕੀਤੀ | ਇਹ ਹਵੇਲੀ ਅਦਾਕਾਰ ਪਿ੍ਥਵੀਰਾਜ ਕਪੂਰ ਦਾ ਜੱਦੀ ਘਰ ਹੈ, ਜੋ ਕਿ ਫ਼ਿਲਮ ਇੰਡਸਟਰੀ ਵਿਚ ਆਉਣ ਵਾਲੇ ਕਪੂਰ ਪਰਿਵਾਰ ਦੇ ਪਹਿਲੇ ਮੈਂਬਰ ਸਨ | ਉਨ੍ਹਾਂ ਦੇ ਪਿਤਾ ਦੀਵਾਨ ਬਸ਼ੇਸ਼ਵਰਨਾਥ ਕਪੂਰ ਨੇ ਸਾਲ 1918 ਅਤੇ 1922 ਦੇ ਵਿਚਕਾਰ ਇਹ ਹਵੇਲੀ ਬਣਾਈ ਸੀ | ਅਦਾਕਾਰ ਰਾਜ ਕਪੂਰ ਅਤੇ ਤਿ੍ਲੋਕ ਕਪੂਰ ਇਸੇ ਹਵੇਲੀ 'ਚ ਪੈਦਾ ਹੋਏ | ਇਸ ਹਵੇਲੀ 'ਚ ਲਗਭਗ 40 ਕਮਰੇ ਹਨ | ਰਿਸ਼ੀ ਕਪੂਰ ਅਤੇ ਰਣਧੀਰ ਕਪੂਰ ਨੇ 1990 ਦੇ ਦਹਾਕੇ 'ਚ ਇਸ ਸਥਾਨ ਦਾ ਦੌਰਾ ਕੀਤਾ ਸੀ |