ਸੰਗਰੂਰ, 25 ਜੂਨ (ਧੀਰਜ ਪਸੋਰੀਆ)– ਸੰਗਰੂਰ ਦੀ ਧੂਰੀ ਰੋਡ ਤੇ ਬਰਨਾਲਾ ਕੈਂਚੀਆਂ ਤੋਂ ਓਵਰਬ੍ਰਿਜ ਤੱਕ ਅਤੇ ਪੁਲ ਦੀਆਂ ਦੋਨੇ ਸਾਈਡਾਂ ’ਤੇ ਪ੍ਰੀਮਿਕਸ ਪਾਉਣ ਦੇ ਨਾਲ ਲੋਕਾਂ ਦੀ ਲੰਬੇ ਸਮੇਂ ਤੋਂ ਲਟਕ ਰਹੀ ਮੰਗ ਦੀ ਪੂਰਤੀ ਹੋਈ ਹੈ।ਇਸ ਤੋਂ ਇਲਾਵਾ ਪੁਲ ਉੱਪਰ ਜੋ ਖੱਡੇ ਬਣ ਗਏ ਸਨ, ਉਨ੍ਹਾਂ ਨੂੰ ਵੀ ਭਰ ਦਿੱਤਾ ਗਿਆ। ਇਹ ਪ੍ਰਗਟਾਵਾ ਕਰਦਿਆਂ ਸੰਗਰੂਰ ਤੋਂ ਵਿਧਾਇਕਾ ਨਰਿੰਦਰ ਕੌਰ ਭਰਾਜ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਲੋਕਾਂ ਦੀ ਹਰ ਸਮੱਸਿਆ ਦਾ ਹੱਲ ਕਰਨ ਲਈ ਵਚਨਬੱਧ ਹੈ । ਬਤੌਰ ਵਿਧਾਇਕਾ ਉਸ ਦੀ ਸੰਗਰੂਰ, ਭਵਾਨੀਗੜ੍ਹ ਸਮੇਤ ਸਾਰੇ ਪਿੰਡਾਂ ’ਤੇ ਪੂਰੀ ਨਜ਼ਰ ਹੈ ਜਿੱਥੇ ਵੀ ਕਿਸੇ ਵਿਕਾਸ ਕਾਰਜ ਦੀ ਲੋੜ ਹੈ ਉਸੇ ਵਾਸਤੇ ਫੰਡਾਂ ਦਾ ਪ੍ਰਬੰਧ ਕਰ ਕੇ ਉਥੇ ਵਿਕਾਸ ਦੇ ਕੰਮ ਕਰਵਾਏ ਜਾ ਰਹੇ ਹਨ । ਹਲਕੇ ’ਚ ਜਿੱਥੇ ਸਿਹਤ ਸੇਵਾਵਾਂ ਤੇ ਸਿੱਖਿਆ ਸੇਵਾਵਾਂ ਵਿੱਚ ਕ੍ਰਾਂਤੀਕਾਰੀ ਬਦਲਾਅ ਆਏ ਹਨ ਉਥੇ ਕਈ ਨਵੀਆਂ ਸੜਕਾਂ ਬਣਾ ਕੇ ਤੇ ਕਈਆਂ ਦੀ ਰੈਨੋਵੇਸ਼ਨ ਕਰ ਕੇ ਲੋਕਾਂ ਦੇ ਸਫਰ ਨੂੰ ਸੁੱਖਾਲਾ ਕੀਤਾ ਗਿਆ ਹੈ । ਵਿਧਾਇਕਾ ਭਰਾਜ ਨੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੀਆਂ ਕਈ ਯੋਜਨਾਵਾਂ ਦਾ ਜ਼ਿਕਰ ਕੀਤਾ ਜਿਸ ਤੋਂ ਪੰਜਾਬ ਵਾਸੀ ਲਾਭ ਪ੍ਰਾਪਤ ਕਰ ਰਹੇ ਹਨ ।
