ਜਨਾਬ ਦਾਗ਼ ਦੇਹਲਵੀ ਦਾ ਸ਼ੁੱਭ ਨਾਂਅ ਨਵਾਬ ਮਿਰਜ਼ਾ ਖ਼ਾਨ ਸੀ। ਉਹ ਉਰਦੂ ਅਦਬ ਦੇ ਸ਼ਹਿਨਸ਼ਾਹ ਕਰਕੇ ਮਸ਼ਹੂਰ ਸਨ। ਉਨ੍ਹਾਂ ਨੂੰ ਮਿਲਣ ਦੇ ਚਾਹਵਾਨਾਂ ਵਿਚ ਅਦਬੀ ਅਤੇ ਸੱਤਾ ਨਾਲ ਜੁੜੇ ਹੋਏ ਲੋਕ ਸ਼ਾਮਿਲ ਸਨ। ਇਕ ਵਾਰੀ ਉਹ ਨਮਾਜ਼ ਪੜ੍ਹ ਰਹੇ ਸਨ ਕਿ ਉਨ੍ਹਾਂ ਨੂੰ ਮਿਲਣ ਲਈ ਇਕ ਨਾਮਵਰ ਹਸਤੀ ਆਈ। ਉਨ੍ਹਾਂ ਨੂੰ ਨਮਾਜ਼ ਵਿਚ ਮਸ਼ਰੂਫ਼ ਵੇਖ ਕੇ ਉਹ ਹਸਤੀ ਬਿਨਾਂ ਕੋਈ ਸੰਦੇਸ਼ ਦਿੱਤੇ ਹੀ ਵਾਪਸ ਚਲੀ ਗਈ। ਉਸੇ ਵੇਲੇ ਦਾਗ਼ ਸਾਹਿਬ ਨੇ ਸਲਾਮ ਫੇਰਿਆ। ਉਨ੍ਹਾਂ ਦੇ ਨੌਕਰ ਨੇ ਨਮਾਜ਼ ਪੜ੍ਹਦੇ ਸਮੇਂ ਕਿਸੇ ਦੇ ਮਿਲਣ ਆਉਣ ਦੀ ਗੱਲ ਕਹੀ ਤਾਂ ਦਾਗ਼ ਸਾਹਿਬ ਨੇ ਕਿਹਾ, 'ਭੱਜ ਕੇ ਜਾਹ, ਅਜੇ ਉਹ ਰਸਤੇ ਵਿਚ ਹੀ ਹੋਣਗੇ, ਉਨ੍ਹਾਂ ਨੂੰ ਬੁਲਾ ਲਿਆ।'
ਨੌਕਰ ਭੱਜਾ-ਭੱਜਾ ਗਿਆ ਅਤੇ ਉਸ ਬੰਦੇ ਨੂੰ ਬੁਲਾ ਲਿਆਇਆ। ਦਾਗ਼ ਸਾਹਿਬ ਨੇ ਉਸ ਨੂੰ ਪੁੱਛਿਆ, 'ਤੁਸੀਂ ਆ ਕੇ ਵਾਪਸ ਕਿਉਂ ਚਲੇ ਗਏ?' ਉਸ ਨੇ ਜਵਾਬ ਦਿੱਤਾ, 'ਤੁਸੀਂ ਨਮਾਜ਼ ਪੜ੍ਹ ਰਹੇ ਸੀ, ਇਸ ਲਈ ਮੈਂ ਵਾਪਸ ਜਾਣਾ ਹੀ ਠੀਕ ਸਮਝਿਆ। ਨਮਾਜ਼ ਪੜ੍ਹਨ ਵਿਚ ਮੈਂ ਤੁਹਾਡਾ ਅੜਿੱਕਾ ਨਹੀਂ ਬਣਨਾ ਚਾਹੁੰਦਾ ਸੀ।' ਦਾਗ਼ ਸਾਹਿਬ ਨੇ ਕਿਹਾ, 'ਜਨਾਬ ਮੈਂ ਨਮਾਜ਼ ਪੜ੍ਹ ਰਿਹਾ ਸਾਂ, ਲਾਹੌਲ ਤਾਂ ਨਹੀਂ ਪੜ੍ਹ ਰਿਹਾ ਕਿ ਤੁਸੀਂ ਭੱਜ ਗਏ।'
ਲਾਹੌਲ ਪੜ੍ਹਨ ਦਾ ਅਰਥ ਹੈ ਨਫ਼ਰਤ ਦਾ ਕਲਮਾ ਪੜ੍ਹਨਾ, ਸ਼ੈਤਾਨ ਅਤੇ ਭੂਤ ਪ੍ਰੇਤ ਨੂੰ ਭਜਾਉਣ ਲਈ ਲਾਹੌਲ ਪੜ੍ਹਨਾ।
-ਜੇਠੀ ਨਗਰ, ਮਾਲੇਰਕੋਟਲਾ ਰੋਡ, ਖੰਨਾ-141401 (ਪੰਜਾਬ)। ਮੋਬਾਈਲ : 94170-91668
