ਸੈਕਰਾਮੈਂਟੋ, 2 ਅਪ੍ਰੈਲ (ਹੁਸਨ ਲੜੋਆ ਬੰਗਾ)-ਮਿਆਮੀ ਇੰਟਰਨੈਸ਼ਨਲ ਹਵਾਈ ਅੱਡੇ 'ਤੇ ਵਾਧੂ ਭਾਰ ਲਈ ਅਦਾਇਗੀ ਨਾ ਕਰਨ 'ਤੇ ਹੋਏ ਝਗੜੇ ਉਪਰੰਤ 3 ਔਰਤਾਂ ਨੂੰ ਗਿ੍ਫਤਾਰ ਕਰ ਲੈਣ ਦੀ ਖਬਰ ਹੈ | ਔਰਤਾਂ ਵੱਲੋਂ ਕੀਤੇ ਝਗੜੇ ਕਾਰਨ ਫਰੰਟੀਅਰ ਏਅਰਲਾਈਨਜ ਦੇ ਜਹਾਜ਼ ਦੀ ਉਡਾਣ ਵਿੱਚ ਤਕਰੀਬਨ ਇਕ ਘੰਟੇ ਦੀ ਦੇਰੀ ਹੋਈ | ਗਿ੍ਫਤਾਰ ਔਰਤਾਂ ਵਿੱਚ ਨਫੀਸਾ ਡਾਕਰੀ (30), ਡਿਓਨਜਾਨਾ ਕੋਚਰਨ (21) ਤੇ ਡਵਾਨਾ ਕੋਚਰਨ (26) ਸ਼ਾਮਿਲ ਹਨ | ਇਨਾਂ ਵਿਰੁੱਧ ਫੌਜਦਾਰੀ ਦੋਸ਼ ਲਾਏ ਗਏ ਹਨ | ਔਰਤਾਂ ਨੇ ਫਿਲਾਡੈਲਫੀਆ ਜਾਣਾ ਸੀ | ਜਦੋਂ ਇਕ ਮੁਲਾਜ਼ਮ ਨੇ ਵੇਖਿਆ ਕਿ ਉਨ੍ਹਾਂ ਨੇ ਇਕ ਬੈਗ ਦੀ ਅਦਾਇਗੀ ਕੀਤੀ ਹੈ ਜਦ ਕਿ ਉਨਾਂ ਕੋਲ ਦੋ ਬੈਗ ਹਨ ਤਾਂ ਉਸ ਨੇ ਦੂਸਰੇ ਬੈਗ ਦੀ ਵੀ ਅਦਾਇਗੀ ਕਰਨ ਲਈ ਕਿਹਾ ਤਾਂ ਝਗੜਾ ਏਨਾ ਵਧ ਗਿਆ ਕਿ ਪੁਲਿਸ ਸੱਦਣੀ ਪਈ | ਗਿ੍ਫਤਾਰੀ ਵਾਰੰਟ ਹਾਸਲ ਕਰਨ ਉਪਰੰਤ ਪੁਲਿਸ ਨੇ ਉਨਾਂ ਨੂੰ ਗਿ੍ਫਤਾਰ ਕਰ ਲਿਆ |
