ਲੁਧਿਆਣਾ, 26 ਜੂਨ (ਪਰਮਿੰਦਰ ਸਿੰਘ ਆਹੂਜਾ)-ਸਥਾਨਕ ਘੁਮਾਰ ਮੰਡੀ ਇਲਾਕੇ ਵਿੱਚ ਹੋਏ ਇੱਕ ਹਾਦਸੇ ’ਚ 11 ਸਾਲ ਦੇ ਬੱਚੇ ਦੀ ਮੌਤ ਹੋ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਅਨੁਸਾਰ ਮ੍ਰਿਤਕ ਦੇ ਛੋਟੇ ਭਰਾ ਨੇ ਆਟੋ ਰਿਕਸ਼ਾ ਨੂੰ ਅਚਾਨਕ ਸਟਾਰਟ ਕਰ ਦਿੱਤਾ ਜੋ ਕਿ ਉਸ ਦੇ ਭਰਾ ਵਿੱਚ ਜਾ ਵੱਜਾ, ਗੰਭੀਰ ਹਾਲਤ ਵਿੱਚ ਉਸ ਨੂੰ ਹਸਪਤਾਲ ਲਿਆਂਦਾ ਗਿਆ ਜਿੱਥੇ ਉਹ ਇਲਾਜ ਦੌਰਾਨ ਦਮ ਤੋੜ ਗਿਆ। ਜਾਣਕਾਰੀ ਅਨੁਸਾਰ ਮ੍ਰਿਤਕ ਦੀ ਸ਼ਨਾਖਤ ਸੱਤਿਅਮ ਵਜੋਂ ਕੀਤੀ ਗਈ ਹੈ।ਸੱਤਿਅਮ ਦਾ ਪਿਤਾ ਸਤੀਸ਼ ਕੁਮਾਰ ਮੂਲ ਰੂਪ ਵਿੱਚ ਉੱਤਰ ਪ੍ਰਦੇਸ਼ ਦਾ ਰਹਿਣ ਵਾਲਾ ਹੈ ਪਰ ਪਿਛਲੇ ਕੁਝ ਸਾਲਾਂ ਤੋਂ ਉਹ ਲੁਧਿਆਣਾ ਵਿਖੇ ਰਹਿ ਕੇ ਆਟੋ ਰਿਕਸ਼ਾ ਚਲਾ ਰਿਹਾ ਹੈ। ਦੁਪਹਿਰ ਸਤੀਸ਼ ਆਪਣੇ ਘਰ ਆਇਆ ਤੇ ਉਸ ਨੇ ਆਪਣਾ ਆਟੋ ਰਿਕਸ਼ਾ ਘਰ ਦੇ ਬਾਹਰ ਖੜ੍ਹਾ ਕਰ ਦਿੱਤਾ ਇਸ ਦੌਰਾਨ ਸਤੀਸ਼ ਦੇ ਭਰਾ ਪਿੰਟੂ ਦੇ ਦੋਵੇਂ ਲੜਕੇ ਘਰ ਦੇ ਬਾਹਰ ਖੇਡ ਰਹੇ ਸਨ ਕਿ ਪੰਜ ਸਾਲਾ ਬੱਚੇ ਨੇ ਅਚਾਨਕ ਆਟੋ ਸਟਾਰਟ ਕਰ ਦਿੱਤਾ ਜੋ ਕਿ ਨੇੜੇ ਖੜ੍ਹੇ ਉਸ ਦੇ ਭਰਾ ਸੱਤਿਅਮ ’ਚ ਜਾ ਵੱਜਾ, ਗੰਭੀਰ ਹਾਲਤ ਵਿੱਚ ਸੱਤਿਅਮ ਨੂੰ ਹਸਪਤਾਲ ਲਿਆਂਦਾ ਗਿਆ ਜਿੱਥੇ ਡਾਕਟਰ ਉਸ ਨੂੰ ਬਚਾ ਨਹੀਂ ਸਕੇ। ਪਰਿਵਾਰ ਵਲੋਂ ਇਸ ਸਬੰਧੀ ਕੋਈ ਵੀ ਸ਼ਿਕਾਇਤ ਪੁਲਿਸ ਨੂੰ ਨਹੀਂ ਕੀਤੀ ਗਈ ਹੈ ਜਿਸ ਕਾਰਨ ਪੁਲਿਸ ਵਲੋਂ ਕੋਈ ਵੀ ਕਾਰਵਾਈ ਨਹੀਂ ਕੀਤੀ ਗਈ।
