ਲੰਡਨ, 2 ਜੁਲਾਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਭਾਰਤੀ ਮੂਲ ਦੇ ਇਕ ਵਕੀਲ ਨੇ ਇੰਗਲੈਂਡ ਵਿੱਚ ਇੱਕ ਬੈਰਿਸਟਰ ਚੈਂਬਰ ਨੂੰ ਆਕਸਫੋਰਡ ਯੂਨੀਵਰਸਿਟੀ ਤੋਂ ਮੈਡੀਕਲ ਦੀ ਪੜ੍ਹਾਈ ਕਰਨ ਦਾ ਝੂਠਾ ਦਾਅਵਾ ਕਰਕੇ ਗੁੰਮਰਾਹ ਕਰਨ ਦੇ ਦੋਸ਼ ਵਿੱਚ ਆਪਣੇ ਕਾਨੂੰਨੀ ਪੇਸ਼ੇ ‘ਤੇ ਲੱਗੀ ਪਾਬੰਦੀ ਖ਼ਿਲਾਫ਼ ਹਾਈ ਕੋਰਟ ਵਿੱਚ ਦਾਇਰ ਮੁਕੱਦਮੇ ਵਿੱਚ ਜਿੱਤ ਹਾਸਲ ਕਰ ਲਈ ਹੈ। ਅਨੁਰਾਗ ਮੋਹਿੰਦਰੂ (51) ‘ਤੇ ਬ੍ਰਿਟੇਨ ਦੇ ‘ਬਾਰ ਸਟੈਂਡਰਡਜ਼ ਬੋਰਡ’ ਨੇ ਬੇਈਮਾਨੀ ਅਤੇ ਪੇਸ਼ੇਵਰ ਮਰਿਆਦਾ ਨੂੰ ਠੇਸ ਪਹੁੰਚਾਉਣ ਦਾ ਦੋਸ਼ ਲਗਾਇਆ ਸੀ। ਪਿਛਲੇ ਸਾਲ ਇੱਕ ਸੁਤੰਤਰ ਟ੍ਰਿਬਿਊਨਲ ਨੇ ਉਨ੍ਹਾਂ ਨੂੰ ਪੇਸ਼ੇਵਰ ਦੁਰਾਚਾਰ ਦਾ ਦੋਸ਼ੀ ਮੰਨਦਿਆਂ ਉਨ੍ਹਾਂ ਦੇ ਵਕਾਲਤ ਕਰਨ ‘ਤੇ ਪਾਬੰਦੀ ਲਗਾ ਦਿੱਤੀ ਸੀ। ਹਾਲਾਂਕਿ, ਬਾਅਦ ਵਿੱਚ ਹਾਈ ਕੋਰਟ ਨੇ ਇਸ ਪਾਬੰਦੀ ਨੂੰ ਰੱਦ ਕਰ ਦਿੱਤਾ ਅਤੇ ਉਨ੍ਹਾਂ ਦੀ ਸਜ਼ਾ ਨੂੰ ਘਟਾ ਕੇ ਮੁਅੱਤਲੀ ਵਿੱਚ ਬਦਲ ਦਿੱਤਾ, ਜਿਸਦੀ ਮਿਆਦ ਮੰਗਲਵਾਰ ਨੂੰ ਖ਼ਤਮ ਹੋ ਗਈ ਹੈ। ਇਸ ਦੇ ਨਾਲ ਹੀ ਮੋਹਿੰਦਰੂ ਲਈ ਦੁਬਾਰਾ ਬੈਰਿਸਟਰ ਵਜੋਂ ਕੰਮ ਕਰਨ ਦਾ ਰਸਤਾ ਸਾਫ਼ ਹੋ ਗਿਆ ਹੈ। ਅਦਾਲਤੀ ਖ਼ਬਰਾਂ ਅਨੁਸਾਰ, ਜਸਟਿਸ ਜੌਨਸਨ ਨੇ ਕਿਹਾ ਕਿ “ਜਨਤਾ ਇਸ ਅੰਤਰ ਨੂੰ ਸਮਝਣ ਦੇ ਸਮਰੱਥ ਹੈ ਕਿ ਇੱਕ ਅਜਿਹਾ ਪੇਸ਼ੇਵਰ ਜਿਸ ਨੇ ਹਾਲ ਹੀ ਵਿੱਚ ਬੇਈਮਾਨੀ ਕੀਤੀ ਹੋਵੇ ਜਾਂ ਜਿਸਦੀ ਬੇਈਮਾਨੀ ਲਗਾਤਾਰ ਜਾਰੀ ਰਹਿਣ ਵਾਲੇ ਵਿਵਹਾਰ ਦਾ ਹਿੱਸਾ ਹੋਵੇ, ਅਤੇ ਦੂਜਾ ਅਜਿਹਾ ਵਿਅਕਤੀ ਜਿਸ ਦਾ ਦੁਰਾਚਾਰ ਕਈ ਸਾਲ ਪਹਿਲਾਂ ਹੋਇਆ ਹੋਵੇ, ਜਿਸਦੀ ਦੁਹਰਾਈ ਨਾ ਹੋਈ ਹੋਵੇ ਅਤੇ ਜਿਸਦੇ ਬਾਅਦ ਦੇ ਆਚਰਣ ਵਿੱਚ ਲੰਮੇ ਸਮੇਂ ਤੱਕ ਇਮਾਨਦਾਰੀ ਦਾ ਪ੍ਰਗਟਾਵਾ ਕੀਤਾ ਗਿਆ ਹੋਵੇ।” ਉਨ੍ਹਾਂ ਅੱਗੇ ਕਿਹਾ ਕਿ ਅਜਿਹੇ ਮਾਮਲਿਆਂ ਵਿੱਚ ਉਸ ਪੇਸ਼ੇਵਰ ਨੂੰ ਹਮੇਸ਼ਾ ਲਈ ਉਸਦੇ ਪੇਸ਼ੇ ਤੋਂ ਬਾਹਰ ਕੀਤੇ ਬਿਨਾਂ ਵੀ, ਬੇਈਮਾਨੀ ਦੀ ਗੰਭੀਰਤਾ ਨੂੰ ਰੇਖਾਂਕਿਤ ਕਰਨ ਵਾਲੀ ਸਜ਼ਾ ਦੇ ਕੇ ਜਨਤਾ ਦਾ ਵਿਸ਼ਵਾਸ ਬਣਾਈ ਰੱਖਿਆ ਜਾ ਸਕਦਾ ਹੈ। ਬਾਰ ਸਟੈਂਡਰਡਜ਼ ਬੋਰਡ ਦੇ ਰਿਕਾਰਡ ਵਿੱਚ ਅਪਡੇਟ ਕੀਤੀ ਗਈ ਜਾਣਕਾਰੀ ਅਨੁਸਾਰ, ਹੁਣ ਮੋਹਿੰਦਰੂ ਬਾਰੇ ਕਿਹਾ ਗਿਆ ਹੈ ਕਿ ਉਹ 7 ਅਕਤੂਬਰ 2025 ਤੋਂ 30 ਜੂਨ 2026 ਤੱਕ ਵਕਾਲਤ ਕਰਨ ਤੋਂ ਮੁਅੱਤਲ ਰਹੇ। ਬੀ.ਐੱਸ.ਬੀ. ਦੇ ਅਨੁਸਾਰ ਮੋਹਿੰਦਰੂ ਨੇ ਜਾਣਬੁੱਝ ਕੇ ਚੈਂਬਰਜ਼ ਦੇ ਮੈਂਬਰਾਂ ਨੂੰ ਇਹ ਕਹਿ ਕੇ ਗੁੰਮਰਾਹ ਕੀਤਾ ਜਾਂ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕੀਤੀ ਕਿ ਉਨ੍ਹਾਂ ਨੇ ਆਕਸਫੋਰਡ ਯੂਨੀਵਰਸਿਟੀ ਵਿੱਚ ਬਾਇਓਮੈਡੀਕਲ ਸਾਇੰਸ ਜਾਂ ਮੈਡੀਸਨ ਦੀ ਪੜ੍ਹਾਈ ਕੀਤੀ ਸੀ, ਜਦੋਂ ਕਿ ਉਹ ਜਾਣਦੇ ਸਨ ਕਿ ਇਹ ਦਾਅਵਾ ਝੂਠਾ ਹੈ। ਉਹ ਜਾਣਦੇ ਸਨ ਕਿ ਉਨ੍ਹਾਂ ਨੇ ਆਕਸਫੋਰਡ ਯੂਨੀਵਰਸਿਟੀ ਵਿੱਚ ਪੜ੍ਹਾਈ ਨਹੀਂ ਕੀਤੀ ਸੀ। ਬੀ.ਐੱਸ.ਬੀ. ਨੇ ਨੋਟ ਕੀਤਾ ਕਿ ਇਹ ਮਾਮਲਾ 13 ਸਾਲ ਤੋਂ ਵੱਧ ਪੁਰਾਣਾ ਹੈ। ਜ਼ਿਕਰਯੋਗ ਹੈ ਕਿ ਮੋਹਿੰਦਰੂ ਨੂੰ ਸਾਲ 2004 ਵਿੱਚ ਲੰਡਨ ਦੇ ‘ਮਿਡਲ ਟੈਂਪਲ ਇਨ’ ਦੁਆਰਾ ਇੰਗਲੈਂਡ ਅਤੇ ਵੇਲਜ਼ ਦੇ ਬਾਰ ਵਿੱਚ ਸ਼ਾਮਲ ਕੀਤਾ ਗਿਆ ਸੀ। ਉਨ੍ਹਾਂ ਨੂੰ ਸੀਨੀਅਰ ਕਾਨੂੰਨੀ ਪੇਸ਼ੇਵਰ ਵਜੋਂ ‘ਕਿੰਗਜ਼ ਕੌਂਸਲ’ ਦੀ ਉਪਾਧੀ ਵੀ ਹਾਸਲ ਹੈ।
