ਜਲੰਧਰ, 29 ਜੂਨ (ਸ਼ਿਵ)- ਇਸ ਸਾਲ ਵੀ ਕਾਲਾ ਸੰਘਿਆਂ ਨਹਿਰ ਦੀ ਸਫ਼ਾਈ ਨਾ ਹੋਣ ਕਰਕੇ ਪਾਣੀ ਦੇ ਓਵਰ ਫਲੋ ਹੋਣ ਨਾਲ ਕਾਲੀਆ ਕਾਲੋਨੀ ਸਮੇਤ ਹੋਰ ਆਸਪਾਸ ਰਹਿਣ ਵਾਲੇ ਲੋਕਾਂ ਨੂੰ ਨੁਕਸਾਨ ਦੀ ਸ਼ੰਕਾ ਜਾਹਿਰ ਹੋ ਰਹੀ ਹੈ ਕਿਉਂਕਿ ਕੁੱਝ ਦਿਨ ਪਹਿਲਾਂ ਵੀ ਇਸ ਨਾਲੇ ਦਾ ਪਾਣੀ ਓਵਰ ਫਲੋ ਹੋਣ ਨਾਲ ਆਸਪਾਸ ਇਲਾਕਿਆਂ ਵਿਚ ਚਲਾ ਗਿਆ ਸੀ। ਉਂਜ ਲੋਕਾਂ ਨੇ ਪਾਣੀ ਦੇ ਓਵਰ ਫਲੋ ਹੋਣ ਨਾਲ ਆਪਣੇ ਮਕਾਨਾਂ, ਕੋਠੀਆਂ ਨੂੰ ਹੋਣ ਵਾਲੇ ਨੁਕਸਾਨ ਤੋਂ ਬਚਾਉਣ ਲਈ ਕਈ ਥਾਵਾਂ ’ਤੇ ਮਿੱਟੀ ਨਾਲ ਭਰੀਆਂ ਬੋਰੀਆਂ ਵੀ ਲਗਾ ਰੱਖੀਆਂ ਹਨ। ਕਾਲੀਆ ਕਾਲੋਨੀ ਦੇ ਲੋਕਾਂ ਦਾ ਕਹਿਣਾ ਸੀ ਕਿ ਇਸ ਨਹਿਰ ਵਿਚ ਉਂਜ ਗਦਈਪੁਰ ਦਾ ਪਾਣੀ ਆਉਂਦਾ ਹੈ ਪਰ ਜਦੋਂ ਇਸ ਨਹਿਰ ਵਿਚ ਪਿੱਛੇ ਤੋਂ ਪਾਣੀ ਛੱਡਿਆ ਜਾਂਦਾ ਹੈ ਤਾਂ ਉਸ ਵੇਲੇ ਕਈ ਬਾਰ ਓਵਰ ਫਲੋ ਹੋ ਜਾਂਦਾ ਹੈ ਤੇ ਪਾਣੀ ਕਾਲੋਨੀਆਂ ਵਿਚ ਚਲਾ ਜਾਂਦਾ ਹੈ। ਉਂਜ ਇਸ ਨਹਿਰ ਦੀ ਇਸ ਬਾਰੇ ਸਫ਼ਾਈ ਨਹੀਂ ਹੈ ਤਾਂ ਬੂਟੀ ਭਰੀ ਹੋਈ ਹੈ ਜਿਸ ਨਾਲ ਪਾਣੀ ਜਲਦੀ ਹੀ ਓਵਰ ਫਲੋ ਹੋ ਜਾਂਦਾ ਹੈ। ਲੋਕਾਂ ਦਾ ਕਹਿਣਾ ਸੀ ਕਿ ਨਗਰ ਨਿਗਮ ਪ੍ਰਸ਼ਾਸਨ ਨੂੰ ਇਸ ਬਾਰੇ ਸਿੰਚਾਈ ਵਿਭਾਗ ਨਾਲ ਵੀ ਗੱਲ ਕਰ ਕੇ ਇਸ ਸਮੱਸਿਆ ਦਾ ਹੱਲ ਕੱਢਣਾ ਚਾਹੀਦਾ ਹੈ। ਬਰਸਾਤਾਂ ਵਿਚ ਜੇਕਰ ਜ਼ਿਆਦਾ ਮੀਂਹ ਪੈਂਦਾ ਹੈ ਤਾਂ ਲੋਕਾਂ ਲਈ ਹੋਰ ਵੀ ਮੁਸ਼ਕਲ ਖੜੀ ਹੋ ਜਾਵੇਗੀ। ਉਨਾਂ ਕਿਹਾ ਕਿ ਨਗਰ ਨਿਗਮ ਦੀ ਹੱਦ ਵਿਚ ਜਿੱਥੇ ਵੀ ਇਹ ਨਾਲਾ ਲੰਘਦਾ ਹੈ ਤਾਂ ਪਾਣੀ ਓਵਰ ਫਲੋ ਹੋਣ ਨਾਲ ਕਈ ਲੋਕਾਂ ਦਾ ਨੁਕਸਾਨ ਕਰ ਸਕਦਾ ਹੈ। ਇਸ ਨਹਿਰ ਦੀ ਸਫ਼ਾਈ ਦੇ ਟੈਂਡਰ ਪਹਿਲਾਂ ਹੋਣੇ ਚਾਹੀਦੇ ਸਨ। ਚਾਰ ਦਿਨ ਪਹਿਲਾਂ ਵੀ ਪਾਣੀ ਓਵਰ ਫਲੋ ਹੋ ਗਿਆ ਸੀ ਤਾਂ ਨੀਵੇਂ ਇਲਾਕਿਆਂ ਵਿਚ ਪਾਣੀ ਭਰ ਗਿਆ ਸੀ। ਲੋਕਾਂ ਨੇ ਮੰਗ ਕੀਤੀ ਕਿ ਇਸ ਨਹਿਰ ਦੀ ਸਫ਼ਾਈ ਜਲਦੀ ਤੋਂ ਜਲਦੀ ਕਰਵਾਈ ਜਾਵੇ ਕਿਉਂਕਿ ਇਸ ਨਾਲੇ ਤੋਂ ਕਦੇ ਵੀ ਪਾਣੀ ਦੇ ਓਵਰ ਫਲੋ ਹੋਣ ਨਾਲ ਨੁਕਸਾਨ ਦੀ ਸ਼ੰਕਾ ਬਣੀ ਰਹਿੰਦੀ ਹੈ।
