ਬਾਦਸ਼ਾਹ ਦਰਵੇਸ਼ <h4>* ਡਾ: ਸਰਬਜੀਤ ਕੌਰ ਸੰਧਾਵਾਲੀਆ * </h4>

ਬਾਦਸ਼ਾਹ ਦਰਵੇਸ਼, ਤੇਰਾ ਨਾਮ ਮਸਤਕ ਵਿਚ ਜਗੇ,
ਅੱਜ ਤੇਰੀ ਯਾਦ ਅੰਦਰ ਪਿਆਰ ਦੇ ਹੰਝੂ ਵਗੇ।
ਅੰਬਰਾਂ ਦੇ ਪਾਤਸ਼ਾਹ ਤੂੰ ਧਰਤੀਆਂ ਦਾ ਨੂਰ ਹੈਂ,
ਹਰ ਦਿਸ਼ਾ ਅੰਦਰ ਤੇਰੇ ਪ੍ਰਕਾਸ਼ ਦਾ ਦੀਵਾ ਜਗੇ।
ਝਰਨਿਆਂ, ਨਦੀਆਂ ਤੇ ਝੀਲਾਂ, ਸਾਗਰਾਂ ਬੱਦਲਾਂ 'ਚ ਵੀ,
ਸਾਹਿਬਾ ਤੇਰੀ ਮੁਹੱਬਤ ਮਿਹਰ ਦਾ ਹੀ ਜਲ ਵਗੇ।
ਚੰਨ, ਤਾਰੇ, ਗੀਤ, ਨਜ਼ਮਾਂ, ਫੁੱਲ, ਕੋਇਲਾਂ, ਬੁਲਬੁਲਾਂ,
ਸਾਰਿਆਂ ਅੰਦਰ ਤੇਰੇ ਅਹਿਸਾਸ ਦੀ ਜੋਤੀ ਜਗੇ।
ਨੀਵਿਆਂ, ਦੁਤਕਾਰਿਆਂ ਤੇ ਬੇਕਸਾਂ ਦੇ ਵਿਚ ਵੀ,
ਪਿਆਰ ਤੇਰੇ ਹੌਸਲੇ ਤੇਰੇ ਦਾ ਹੀ ਚਾਨਣ ਮਘੇ।
ਧੜਕਣਾਂ ਅੰਦਰ ਤੇਰਾ ਵਿਸ਼ਵਾਸ ਠਾਠਾਂ ਮਾਰਦਾ,
ਨਾੜੀਆਂ ਅੰਦਰ ਤੇਰਾ ਅਨੁਰਾਗ ਤੇ ਕਰੁਣਾ ਵਗੇ।
ਕਿੰਝ ਕਰਾਂ ਉਪਮਾ ਤੇਰੀ ਤੂੰ ਅੱਖਰਾਂ ਤੋਂ ਪਾਰ ਹੈਂ,
ਕਰ ਲਵੀਂ ਪਰਵਾਨ ਮੇਰੇ ਅੱਥਰੂ ਤੂੰ ਅਣਵਗੇ।