ਸਾਹਿਬ-ਏ-ਕਮਾਲ

* ਡਾ. ਸਰਬਜੀਤ ਕੌਰ ਸੰਧਾਵਾਲੀਆ *
ਨਾਮ ਤੇਰੇ ਨਾਲ ਸਾਹਿਬ ਥਿਰਕਦੀ ਕਾਇਨਾਤ ਹੈ।
ਚੰਨ ਸੂਰਜ ਤਾਰਿਆਂ ਅੰਦਰ ਵੀ ਤੇਰੀ ਝਾਤ ਹੈ।

ਹਰ ਤਰਫ਼ ਤੇਰਾ ਨਜ਼ਾਰਾ, ਹਰ ਤਰਫ਼ ਤੇਰਾ ਜਲਾਲ
ਹੋ ਰਹੀ ਹਰ ਤਰਫ਼ ਤੇਰੇ ਨੂਰ ਦੀ ਬਰਸਾਤ ਹੈ।

ਹਰ ਦਿਸ਼ਾ ਅੰਦਰ ਤੇਰਾ ਜਲਵਾ ਤੇਰਾ ਵਿਸਥਾਰ ਹੈ
ਰਾਤ ਤੈਨੂੰ ਗਾ ਰਹੀ ਤੇ ਗਾ ਰਹੀ ਪ੍ਰਭਾਤ ਹੈ।

ਬੇਕਸਾਂ ਦੇ ਯਾਰ ਤੇਰਾ ਅੰਬਰਾਂ ਵਿਚ ਤਜ਼ਕਰਾ
ਹਰ ਤਰਫ਼ ਹੀ ਪੈ ਰਹੀ ਤੇਰੇ ਕਰਮ ਦੀ ਬਾਤ ਹੈ।
ਹਰ ਤਰਫ਼ ਤੂੰ ਆਪ ਹੀ ਅਨੁਰਾਗ ਬਣ ਕੇ ਫੈਲਿਆ
ਸਾਹਿਬ-ਏ-ਆਲਮ ਹੈਂ ਤੂੰ ਹਰ ਤਰਫ਼ ਤੇਰੀ ਜ਼ਾਤ ਹੈ।

ਤਾਕਤਾਂ, ਮਿਹਰਾਮਤਾਂ, ਸਰਸ਼ਾਰੀਆਂ, ਖ਼ੁਦਦਾਰੀਆਂ
ਐ ਮੇਰੇ ਵਡਦਾਤਿਆ, ਤੇਰੀ ਹੀ ਹਰ ਇਕ ਦਾਤ ਹੈ।

ਐ ਮਹਾਂਦਾਨੀ ਤੇਰੇ ਸਿਜਦੇ 'ਚ ਸਾਰਾ ਵਿਸ਼ਵ ਹੈ
ਤੇਰੀ ਮਿਹਰ-ਏ-ਨਦਰਿ ਦੀ ਬੱਸ ਮੰਗਦਾ ਸੌਗਾਤ ਹੈ।

**