ਚੰਡੀਗੜ੍ਹ, 24 ਅਪ੍ਰੈਲ (ਮਾਰਕੰਡਾ)-ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਅੰਕੁਰ ਸਕੂਲ ਦਸਵੀਂ ਕਲਾਸ ਦੇ ਵਿਦਿਆਰਥੀ ਆਦਿਤਿਆ ਖੈਵਾਲ ਦੀ ਚੋਣ ਇਸਰੋ ਦੇ ਪ੍ਰਤਿਸ਼ਠਿਤ ਯੁਵਾ ਵਿਗਿਆਨੀ ਕਾਰਜਕ੍ਰਮ ਲਈ ਕੀਤੀ ਗਈ | ਆਦਿਤਿਆ 11 ਮਈ ਤੋਂ 22 ਮਈ ਤੱਕ ਸਪੇਸ ਐਪਲੀਕੇਸ਼ਨਜ਼ ਸੈਂਟਰ ਅਹਿਮਦਾਬਾਦ 'ਚ ਰਿਹਾਇਸ਼ੀ ਸਿਖਲਾਈ ਪ੍ਰੋਗਰਾਮ 'ਚ ਹਿੱਸਾ ਲਵੇਗਾ | ਜਿਥੇ ਉਹ ਅੰਤਰਿਕਸ਼ ਤਕਨਾਲੋਜੀ, ਸੈਟੇਲਾਈਟ ਪ੍ਰਣਾਲੀਆਂ ਬਾਰੇ ਹੱਥ-ਅਜ਼ਮਾਈ ਅਨੁਭਵ ਪ੍ਰਾਪਤ ਕਰੇਗਾ ਅਤੇ ਪ੍ਰਸਿੱਧ ਇਸਰੋ ਵਿਗਿਆਨੀਆਂ ਨਾਲ ਸਿੱਧੀ ਮੁਲਾਕਾਤ ਕਰੇਗਾ | ਵਿਗਿਆਨ ਪ੍ਰਤੀ ਗਹਿਰੀ ਰੁਚੀ ਰੱਖਣ ਵਾਲੇ ਆਦਿਤਿਆ ਨੇ ਇਸ ਤੋਂ ਪਹਿਲਾਂ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ ਆਪਣਾ ਨਾਂਅ ਕਮਾਇਆ ਹੈ | ਉਹ ਕਾਮਿਕ ਕਹਾਣੀ ਮੁਕਾਬਲੇ 'ਚ ਰਾਸ਼ਟਰੀ ਪੱਧਰ ਦਾ ਜੇਤੂ ਵਿਦਿਆਰਥੀ ਹੈ | ਉਸ ਦੀ ਚੋਣ ਲਗਨ, ਨਵੀਨਤਾ ਤੇ ਵਿਗਿਆਨ ਪ੍ਰਤੀ ਡੂੰਘੇ ਜਜ਼ਬੇ ਨੂੰ ਦਰਸਾਉਂਦੀ ਹੈ | ਅੰਕੁਰ ਪਰਿਵਾਰ ਉਸ ਨੂੰ ਦਿਲੋਂ ਵਧਾਈ ਦਿੰਦਾ ਹੈ ਅਤੇ ਉਸ ਦੀ ਇਸ ਪ੍ਰੇਰਣਾਦਾਇਕ ਯਾਤਰਾ ਲਈ ਬਹੁਤ ਸਾਰੀਆਂ ਸ਼ੁੱਭਕਾਮਨਾਵਾਂ ਦਿੰਦਾ ਹੈ |
