ਦੰਦਾਂ ਨੂੰ ਨੁਕਸਾਨ ਨਹੀਂ ਪਹੁੰਚਾਉਂਦਾ 'ਚੀਜ਼'

ਉਂਝ ਤਾਂ ਮੋਟਾਪੇ ਤੋਂ ਪੀੜਤ ਲੋਕਾਂ ਨੂੰ ਚੀਜ਼ ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦਿੱਤੀ ਜਾਂਦੀ ਹੈ ਕਿਉਂਕਿ ਚੀਜ਼ ਵਿਚ ਮੌਜੂਦ ਚਰਬੀ ਅਤੇ ਨਮਕ ਦੋਵੇਂ ਸਿਹਤ ਲਈ ਨੁਕਸਾਨਕਾਰੀ ਹਨ ਪਰ ਹੁਣ ਮਾਹਿਰਾਂ ਨੇ ਆਪਣੀ ਇਕ ਨਵੀਂ ਖੋਜ ਵਿਚ ਪਾਇਆ ਹੈ ਕਿ ਚੀਜ਼ ਭਾਵੇਂ ਮੋਟਾਪੇ ਦਾ ਕਾਰਨ ਹੋਵੇ ਪਰ ਦੰਦਾਂ ਦੀ ਸਿਹਤ ਲਈ ਚੰਗਾ ਹੈ।
ਮਾਹਿਰਾਂ ਨੇ ਬਹੁਤ ਸਮਾਂ ਪਹਿਲਾਂ ਕੀਤੀ ਆਪਣੀ ਇਕ ਖੋਜ ਵਿਚ ਇਹ ਪਾਇਆ ਸੀ ਕਿ ਚੀਜ਼ ਵਿਚ ਕੈਲਸ਼ੀਅਮ ਜਦੋਂ ਮੂੰਹ ਵਿਚ ਜਾ ਕੇ ਲਾਰ ਨਾਲ ਮਿਲਦਾ ਹੈ ਤਾਂ ਇਕ ਇਸ ਤਰ੍ਹਾਂ ਦੀ ਆਣਵਿਕ ਸੰਰਚਨਾ ਦਾ ਨਿਰਮਾਣ ਕਰਦਾ ਹੈ ਜੋ ਦੰਦਾਂ ਨੂੰ ਸੁਰੱਖਿਆ ਦਿੰਦੀ ਹੈ।
ਮਾਹਿਰਾਂ ਅਨੁਸਾਰ ਇਕ ਖੋਜ ਦੌਰਾਨ ਪਾਇਆ ਗਿਆ ਕਿ ਚੀਜ਼ ਵਿਚ ਮੌਜੂਦ ਕੈਲਸ਼ੀਅਮ ਅਤੇ ਫਾਸਫੇਟ ਦੰਦਾਂ ਦੀ ਸੁਰੱਖਿਆ ਪਰਤ ਨੂੰ ਟੁੱਟਣ ਤੇ ਕਮਜ਼ੋਰ ਹੋਣ ਤੋਂ ਬਚਾਉਂਦੇ ਹਨ। ਇਸ ਖੋਜ ਵਿਚ ਕੁਝ ਵਿਅਕਤੀਆਂ ਨੂੰ ਸ਼ੱਕਰ ਪਾਣੀ ਵਿਚ ਘੋਲ ਕੇ ਦਿਨ ਵਿਚ ਛੇ ਤੋਂ ਸੱਤ ਵਾਰ ਕੁਰਲਾ ਕਰਨ ਨੂੰ ਕਿਹਾ ਗਿਆ ਤਾਂ ਕਿ ਦੰਦਾਂ ਤੋਂ ਸਾਰੇ ਖਣਿਜ ਘੁਲ ਜਾਣ। ਫਿਰ ਤੋਂ ਕੁਝ ਵਿਅਕਤੀਆਂ ਨੂੰ ਇਕ ਮਿੰਟ ਤੱਕ ਚੀਜ਼ ਦਾ ਟੁਕੜਾ ਚਬਾਉਣ ਨੂੰ ਦਿੱਤਾ ਗਿਆ ਅਤੇ ਕੁਝ ਇਕ ਨੂੰ ਨਹੀਂ। ਜਿਨ੍ਹਾਂ ਵਿਅਕਤੀਆਂ ਨੇ ਚੀਜ਼ ਦਾ ਟੁਕੜਾ ਚਬਾਇਆ, ਚੀਜ਼ ਦਾ ਟੁਕੜਾ ਨਾ ਚਬਾਉਣ ਵਾਲੇ ਵਿਅਕਤੀਆਂ ਦੇ ਮੁਕਾਬਲੇ ਉਨ੍ਹਾਂ ਦੇ ਦੰਦਾਂ ਨੂੰ 71 ਫ਼ੀਸਦੀ ਘੱਟ ਨੁਕਸਾਨ ਪਹੁੰਚਿਆ।