ਅਮਰੀਕਾ ਨੇ ਖ਼ਤਮ ਕੀਤਾ 24 ਸਾਲਾਂ ਦਾ ਸੋਕਾ

ਸੈਂਟਾ ਕਲਾਰਾ, 2 ਜੁਲਾਈ (ਏਜੰਸੀ)–2026 ਫੀਫਾ ਵਿਸ਼ਵ ਕੱਪ ਦੇ ਰਾਊਂਡ ਆਫ਼ 32 ਮੈਚ ’ਚ, ਸਹਿ-ਮੇਜ਼ਬਾਨ ਅਮਰੀਕਾ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਬੋਸਨੀਆ ਤੇ ਹਰਜ਼ੇਗੋਵਿਨਾ ਨੂੰ 2-0 ਨਾਲ ਹਰਾਇਆ। ਸੈਨ ਫਰਾਂਸਿਸਕੋ ਬੇ ਏਰੀਆ ਸਟੇਡੀਅਮ ’ਚ ਇਸ ਜਿੱਤ ਨਾਲ, ਅਮਰੀਕਾ ਨੇ ਰਾਊਂਡ ਆਫ਼ 16 ’ਚ ਆਪਣੀ ਜਗ੍ਹਾ ਪੱਕੀ ਕਰ ਲਈ ਹੈ। ਆਖਰੀ ਵਾਰ ਅਮਰੀਕਾ ਨੇ ਨਾਕਆਊਟ ਮੈਚ 2002 ਵਿਚ ਜਿੱਤਿਆ ਸੀ, ਜਦੋਂ ਉਨ੍ਹਾਂ ਨੇ ਮੈਕਸੀਕੋ ਨੂੰ 2-0 ਨਾਲ ਹਰਾਇਆ ਸੀ। ਇਹ ਟੀਮ ਦੇ ਵਿਸ਼ਵ ਕੱਪ ਇਤਿਹਾਸ ਵਿਚ ਸਿਰਫ ਦੂਜੀ ਨਾਕਆਊਟ ਜਿੱਤ ਹੈ। ਸ਼ੁਰੂ ਤੋਂ ਹੀ, ਅਮਰੀਕਾ ਨੇ ਹਮਲਾਵਰ ਖੇਡਿਆ ਅਤੇ ਗੇਂਦ ’ਤੇ ਕੰਟਰੋਲ ਬਣਾਈ ਰੱਖਿਆ। ਫੋਲਾਰਿਨ ਬਾਲੋਗੁਨ ਨੇ ਟੀਮ ਲਈ ਇਕ ਸ਼ਾਨਦਾਰ ਗੋਲ ਕੀਤਾ, ਪਰ ਆਫਸਾਈਡ ਕਾਰਨ ਇਸਨੂੰ ਰੱਦ ਕਰ ਦਿੱਤਾ ਗਿਆ। ਹਾਲਾਂਕਿ, ਪਹਿਲੇ ਅੱਧ ’ਚ ਸਟਾਪੇਜ ਸਮੇਂ ਦੌਰਾਨ, ਬਾਲੋਗੁਨ ਨੇ ਇਕ ਹੋਰ ਮੌਕਾ ਬਣਾਇਆ। ਮਲਿਕ ਟਿਲਮੈਨ ਤੋਂ ਇੱਕ ਸ਼ਾਨਦਾਰ ਪਾਸ ਪ੍ਰਾਪਤ ਕਰਦੇ ਹੋਏ, ਉਸਨੇ ਡਿਫੈਂਡਰਾਂ ਨੂੰ ਪਛਾੜ ਦਿੱਤਾ ਤੇ ਗੋਲਕੀਪਰ ਨਿਕੋਲਾ ਵਾਸਿਲਜ ਨੂੰ ਚਕਮਾ ਦਿੰਦੇ ਹੋਏ ਗੇਂਦ ਨੂੰ ਜਾਲ ’ਚ ਸੁੱਟ ਦਿੱਤਾ, ਜਿਸ ਨਾਲ ਅਮਰੀਕਾ ਨੂੰ 1-0 ਦੀ ਬੜ੍ਹਤ ਮਿਲੀ। ਬਾਲੋਗਨ ਪਹਿਲੇ ਹਾਫ ਦੇ ਸਟਾਪੇਜ ਟਾਈਮ ’ਚ ਵੀ ਦੂਜਾ ਗੋਲ ਕਰਨ ਦੇ ਨੇੜੇ ਆਇਆ, ਪਰ ਉਸਦਾ ਸ਼ਾਟ ਕਰਾਸਬਾਰ ’ਚ ਲੱਗਿਆ। ਬੋਸਨੀਆ ਅਤੇ ਹਰਜ਼ੇਗੋਵੀਨਾ ਨੇ ਦੂਜੇ ਹਾਫ ’ਚ ਵਾਪਸੀ ਦੀ ਕੋਸ਼ਿਸ਼ ਕੀਤੀ। ਅਮਰੀਕਾ ਨੂੰ 64ਵੇਂ ਮਿੰਟ ਵਿਚ ਇੱਕ ਵੱਡਾ ਝਟਕਾ ਲੱਗਾ ਜਦੋਂ ਵੀ.ਏ.ਆਰ. ਸਮੀਖਿਆ ਤੋਂ ਬਾਅਦ ਬਾਲੋਗਨ ਨੂੰ ਲਾਲ ਕਾਰਡ ਦਿਖਾ ਕੇ ਬਾਹਰ ਕਰ ਦਿੱਤਾ ਗਿਆ। ਨਤੀਜੇ ਵਜੋਂ, ਅਮਰੀਕਾ ਨੂੰ ਲਗਭਗ ਅੱਧੇ ਘੰਟੇ ਤੱਕ ਦਸ ਖਿਡਾਰੀਆਂ ਨਾਲ ਖੇਡਣ ਲਈ ਮਜਬੂਰ ਹੋਣਾ ਪਿਆ। ਇੱਕ ਖਿਡਾਰੀ ਘੱਟ ਹੋਣ ਦੇ ਬਾਵਜੂਦ, ਅਮਰੀਕਾ ਨੇ ਸ਼ਾਨਦਾਰ ਸੰਜਮ ਦਿਖਾਇਆ ਤੇ ਵਿਰੋਧੀ ਟੀਮ ਨੂੰ ਬਰਾਬਰੀ ਕਰਨ ਦਾ ਕੋਈ ਵੀ ਮੌਕਾ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਮੈਚ ਦੇ ਅੰਤ ਵਿੱਚ, ਮਲਿਕ ਟਿਲਮੈਨ ਨੇ ਫ੍ਰੀ-ਕਿੱਕ ਤੋਂ ਇਕ ਸ਼ਾਨਦਾਰ ਗੋਲ ਕੀਤਾ, ਜਿਸ ਨਾਲ ਟੀਮ ਦੀ ਲੀਡ 2-0 ਹੋ ਗਈ। ਇਸ ਤੋਂ ਪਹਿਲਾਂ, ਕ੍ਰਿਸ਼ਚੀਅਨ ਪੁਲਿਸਿਕ ਦਾ ਇਕ ਗੋਲ ਆਫਸਾਈਡ ਲਈ ਰੱਦ ਕਰ ਦਿੱਤਾ ਗਿਆ ਸੀ।