ਨਿਊਯਾਰਕ, 2 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕਾ ਦੇ ਕੈਨਸਾਸ ਰਾਜ ’ਚ ਹੜ੍ਹ ਦੇ ਤੇਜ਼ ਪਾਣੀ ’ਚ ਰੁੜ੍ਹ ਜਾਣ ਕਾਰਨ ਇਕ ਭਾਰਤੀ ਮੂਲ ਦੇ ਨੌਜਵਾਨ ਨੂਦੀ ਮੌਤ ਦੀ ਖ਼ਬਰ ਹੈ। 33 ਸਾਲਾ ਵੈਂਕਟੇਸ਼ ਡੋਪਾਲਾਉਡੀ ਦੀ ਲਾਸ਼ ਐਤਵਾਰ ਨੂੰ ਸਮਨਰ ਕਾਊਂਟੀ ’ਚ ਮਿਲੀ। ਉਹ ਆਪਣੀ ਕਾਰ ਸਮੇਤ ਹੜ੍ਹ ਦੇ ਪਾਣੀ ’ਚ ਵਹਿ ਗਿਆ ਸੀ। ਜਾਣਕਾਰੀ ਮੁਤਾਬਕ ਹਾਦਸਾ ਸ਼ਨੀਵਾਰ ਨੂੰ ਓਲਿਵਰ ਰੋਡ ਨੇੜੇ ਵਾਪਰਿਆ। ਇਕ ਗਵਾਹ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸਨੇ ਇਕ ਕਾਰ ਨੂੰ ਪਾਣੀ ’ਚ ਜਾਂਦੇ ਵੇਖਿਆ ਤੇ ਕਾਰ ਅੰਦਰ ਕੋਈ ਵਿਅਕਤੀ ਮੌਜੂਦ ਸੀ। ਪਾਣੀ ਦਾ ਵਹਾਅ ਇੰਨਾ ਤੇਜ਼ ਸੀ ਕਿ ਫਾਇਰ ਵਿਭਾਗ ਦੇ ਕਰਮਚਾਰੀ ਤੁਰੰਤ ਪਾਣੀ ’ਚ ਨਹੀਂ ਉਤਰ ਸਕੇ। ਕੈਨਸਾਸ ਹਾਈਵੇ ਪੈਟਰੋਲ ਦੀ ਏਅਰ ਯੂਨਿਟ ਤੇ ਪੁਲਿਸ ਡਰੋਨ ਦੀ ਮਦਦ ਨਾਲ ਤਲਾਸ਼ ਮੁਹਿੰਮ ਚਲਾਈ ਗਈ। ਕਾਰ ਤਾਂ ਮਿਲ ਗਈ ਸੀ ਪਰ ਡਰਾਈਵਰ ਨਹੀਂ ਮਿਲਿਆ। ਅਗਲੇ ਦਿਨ ਐਤਵਾਰ ਦੁਪਹਿਰ 12:19 ਵਜੇ ਉਸਦੀ ਲਾਸ਼ ਓਲਿਵਰ ਰੋਡ ਤੋਂ ਕਰੀਬ ਇੱਕ-ਚੌਥਾਈ ਮੀਲ ਹੇਠਾਂ ਪਾਣੀ ਵਿੱਚੋਂ ਬਰਾਮਦ ਕੀਤੀ ਗਈ।
